Markiza de Pompadur yataqda həll olunan bütöv bir siyasətin əsasını qoymuş, dövlətin daxili və xarici işlərinə təsir gücünə malik bir xanım olmuşdur. Dünya dağılırdı, amma heç kimin onunla işi yox idi. İnsanlar təmtəraq arzusunda idilər və ifrat pul xərcləməklə adlarını tarixə yazmağa can atırdılar. Bu adların hər zaman ikimənalı xatırlanacağı isə onları yalnız sevindirirdi.

Janna Antuanetta Puasson nəinki qadın zərifliyi və cazibəsinə, hətta fransız kralını özünə tabe edəcək və onu idarə edə biləcək qədər iti ağıla da malik idi. Əslində, 15-ci Lüdovik heç vaxt müstəqil qərarları ilə seçilmirdi. Markizadan öncə ölkəni nazir Fleri idarə edirdi. Bütün məsələ burasında idi ki, ölkə siyasətçinin əlindən təcrübəli məşuqənin əlinə keçmişdi.

Markiza ətrafının heyrətinə və nifrətinə səbəb olurdu. O, xəzinəni bahalı əlbisələrinə xərcləyir, xalqı soyub-talayaraq, ədiblərə kömək edirdi. Çox güman ki, xarici siyasət üçün bilik və təcrübəsinin azlığını anlayan markiza hersoq Rişelyeni taparaq, bu işləri ona həvalə edir. Rişelye kifayət qədər uğurlu siyasətçi olsa da xalqın nifrəti ondan da yan keçməmişdi. Ümumiyyətlə, fransız xalqı bütün zadəgan sinfinə nifrət edirdi. İnqilab zamanı da ondan demək olar ki, tamamilə azad olmuşdu.

Bu xanımın kral üzərindəki təsiri o qədər güclü idi ki, artıq onun məşuqəsi olmadığı müddətdə də onu idarə etməyi bacarırdı. Bundan başqa, məşuqunun zövqünə bələd olan markiza, onu gənc kurtizan qadınlarla təmin edirdi. O, 42 yaşında vəfat edərək, özündən sonra qarışıq təəssüratlar yaradan xatirələr qoymuşdur - onları gah silmək istəyirsən, gah da dərs olaraq saxlamaq.